Алкоголь ва тамаки бозорини тартибга солиш инспекцияси томонидан Вазирлар Маҳкамасининг 2019 йил 26 декабрдаги 1039-сон қарорига мувофиқ Республика дегустация комиссиясининг навбатдаги йиғилиши ўтказилди.
19.08.2026Йиғилишда истеъмол этил спирти ва алкоголь маҳсулотларининг органолептик сифат кўрсаткичлари баҳоланиб, маҳсулот сифати ва уни янада такомиллаштириш юзасидан таклифлар ишлаб чиқилди.
Комиссия томонидан 200 га яқин истеъмол этил спирти ва алкоголь маҳсулоти, шунингдек, қайта ишлаб чиқаришга қўйилган ҳамда таркиби янгиланган маҳсулотлар органолептик жиҳатдан баҳоланди.
Дегустациянинг асосий мақсади — маҳсулотнинг сифатини инсон сезги аъзолари орқали баҳолаш ва унинг белгиланган талабларга мувофиқлигини аниқлаш.
Хусусан, ушбу жараёнда қуйидагилар муҳим саналади:
🔸маҳсулотнинг таъми, ҳиди, ранги ва ташқи кўринишини баҳолаш;
🔸маҳсулот сифати ва барқарорлигини назорат қилиш;
🔸янги ёки такомиллаштирилган маҳсулотларнинг истеъмол хусусиятларини аниқлаш;
🔸ишлаб чиқариш технологиясига риоя этилганлигини баҳолаш;
🔸маҳсулот сифатини янада ошириш бўйича таклиф ва тавсиялар ишлаб чиқиш.
Тадбир доирасида маҳсулот сифати бўйича келишмовчиликларни кўриб чиқиш, дегустация баҳолаш амалиётини такомиллаштириш, ташкилотларга услубий ёрдам кўрсатиш, экспертларни халқаро танловларда иштирок этишга тавсия қилиш ҳамда маҳсулот сифати ва технологик жараёнларни яхшилашга оид таклифлар ишлаб чиқиш масалаларига алоҳида эътибор қаратилди.
Йиғилиш якунида дегустацияга тақдим этилган маҳсулотлар, тажрибавий-экспериментал намуналар ва янги номдаги маҳсулотлар бўйича органолептик баҳолаш натижалари асосида тегишли қарорлар қабул қилинди.
