Бош прокуратура ҳузуридаги Иқтисодий жиноятларга қарши курашиш департаменти бошлиғининг ўринбосари Ш.Алиризаев Жиззах вилоятида яширин иқтисодиёт кўламини қисқартириш ва тадбиркорлар учун соғлом рақобат муҳити яратилганлиги аҳволи билан танишди.
16.03.2025Хусусан, Жиззах шаҳридаги кичик саноат зонасида фаолият юритаётган "JANNATI BIBIXONIM" ХК, "KEYS LUCK" МЧЖ, "HAQIQAT-OTABEK" КТИЧК ва "ISKANDARNING ORZULARI" МЧЖларга ташриф буюриб, корхона раҳбарларига норасмий бандликни бартараф этиш, савдо тушумларини яширмаслик ва солиқ маданиятини шакллантириш борасида кўрсатмалар берилди.
Бунинг натижасида тадбиркорлик субъектлари фаолиятида бюджетга 720 млн сўмлик қўшимча солиқлар ҳисобланди, 74 нафар ишчиларнинг фаолияти қонунийлаштирилиб иш ҳақи фонди 50,5 млн сўмдан 148,5 млн сўмга оширилди.
Шунингдек, вилоят солиқ бошқармаси биносида хуфиёна иқтисодиётни қисқартириш бўйича амалга оширилаётган ишлар муҳокама қилиниб, масъул ходимларга тегишли кўрсатмалар берилди.
