Тошкент вилоятида таниқли бренд номи остидаги гигиеник косметика ва маиший кимёвий воситаларини қўлбола усулда ишлаб чиқариш ҳолати фош этилди

01.09.2026

Бош прокуратура ҳузуридаги Департаментнинг Чиноз тумани бўлими ходимлари томонидан ўтказилган тезкор тадбирда “А.Н.” МЧЖ раҳбари У.А. “Бунёдкор” МФЙ ҳудудидаги бинода яширин цех ташкил қилиб, таниқли бренд номи остидаги “CLEAR”, “ЧИСТАЯ ЛИНИЯ”, “GRASS AZELIT”, “YUMOS”, “SAFEGUARD”, “COMET” гигиеник косметика ва маиший кимёвий воситаларни ишлаб чиқараётганлиги аниқланиб, яширин цехдан 5 660 дона “GRASS AZELIT”, 5 080 дона “COMET”, 2 890 дона “CLEAR”, 1 680 дона “ЧИСТАЯ ЛИНИЯ”, 1 224 дона “SAFEGUARD”, 1 000 дона пакетда “COMET”, 486 дона “YUMOS” номли гигиеник косметика ва маиший кимёвий воситалари, 350 кг мел хом-ашёси, 1 800 дона “CLEAR”, 1 400 дона “HEAD & SHOULDERS” ва 300 дона “GRASS AZELIT” номли бўш идишлар ашёвий далил сифатида олинган.
 
Санитария-эпидемиология бўлимининг хулосасига кўра, ушбу маҳсулотлар меъёрларда белгиланган талабларга жавоб бермаслиги, инсон саломатлигига жиддий зарар етказиши ҳамда фойдаланиш ва қайта ишлаш учун яроқсиз эканлиги қайд этилган.

Мазкур ҳолат юзасидан Жиноят кодексининг 276-11-модаси (хавфсизлик талабларига жавоб бермайдиган товарларни ўтказиш мақсадини кўзлаб ишлаб чиқариш,сақлаш, ташиш ёхуд ўтказиш, ишлар бажариш ёки хизматлар кўрсатиш) билан жиноят иши қўзғатилиб, тергов ҳаракатлари ўтказилмоқда.