Табиий газдан ноқонуний фойдаланиш ҳолатлари фош этилди
24.05.2026Бош прокуратура ҳузуридаги Департаментнинг Бўка тумани бўлими ходимлари томонидан ўтказилган тезкор тадбирда фуқаро М.А. “Янги ҳаёт” МФЙ ҳудудидаги хонадонида табиий газ тармоғига тижорат мақсадида ўзбошимчалик билан уланиб, 315,6 млн сўмлик табиий газдан ноқонуний фойдаланганлиги аниқланган.
Департаментнинг Оқдарё тумани бўлими томонидан ўтказилган терговга қадар текширувда фуқаро С.С. “Мустақиллик” МФЙ ҳудудидаги хонадонида табиий газ тармоғига ўзбошимчалик билан уланиб, 127,1 млн сўмлик табиий газдан ноқонуний фойдаланганлиги аниқланган.
Департаментнинг Самарқанд шаҳри бўлими ва бошқа ҳуқуқни муҳофаза қилувчи орган ходимлари ҳамкорлигида ўтказилган терговга қадар текширувда Самарқанд шаҳридаги умумий ўрта таълим мактаби масъул шахслари табиий газ тармоғига ўзбошимчалик билан уланиб, 114,6 млн сўмлик табиий газдан ноқонуний фойдаланганликлари аниқланган.
Мазкур ҳолатлар юзасидан Жиноят кодексининг 169-моддаси (ўғрилик) ва 185-2-моддаси (электр, иссиқлик энергияси, газ, водопроводдан фойдаланиш қоидаларини бузиш) билан жиноят ишлари қўзғатилиб, тергов ҳаракатлари ўтказилмоқда.
