Қалбаки акциз маркали алкоголь ва тамаки маҳсулотларини муомалага чиқарилишининг олди олинди
09.03.2026Бош прокуратура ҳузуридаги Департаментнинг Урганч шаҳри бўлими ходимлари томонидан ўтказилган тезкор тадбирда "X.S." МЧЖ масъул шахслари "Ашхобод” МФЙ ҳудудидаги савдо дўконида қалбаки акциз маркали 1 184 дона алкоголь ва 290 қути тамаки маҳсулотларини сотувга қўйганликлари аниқланиб, ушбу маҳсулотлар ашёвий далил сифатида олинган.
Департаментнинг Бухоро вилояти бошқармаси ходимлари томонидан ўтказилган тезкор тадбирда “J.D.” МЧЖ масъул шахслари Ғиждувон туманидаги савдо дўконида умумий баҳоси 51,6 млн сўмлик 1 201 дона қалбаки акциз маркали алкоголь маҳсулотларини сотувга қўйганликлари аниқланиб, ушбу маҳсулотлар ашёвий далил сифатида олинган.
Мазкур ҳолатлар юзасидан Жиноят кодексининг 176-моддаси (қалбаки пул, акциз маркаси ёки қимматли қоғозлар ясаш, уларни ўтказиш) билан жиноят ишлари қўзғатилиб, тергов ҳаракатлари ўтказилмоқда.
Ҳурматли фуқаролар ва тадбиркорлар, агарда Сиз этил спирти, алкоголь ва тамаки маҳсулотларини қонунга хилоф равишда муомалага киритиш, шунингдек, қалбаки алкоголь ишлаб чиқариш ҳолатларига дуч келсангиз ёки ушбу шахслар ҳақида маълумотга эга бўлсангиз бу ҳақида зудлик билан Иқтисодий жиноятларга қарши курашиш Департаментининг 71-233-10-07 рақамли ишонч телефони орқали маълум қилишингизни сўраймиз.
Мурожаатчиларнинг шахси сир сақланиши кафолатланади!
